ኩርናዕ ሥነ ጥበብ

ኣምጹለይ ሽጒርቲ
ክተክል ሽጒርቲ
ዘመን ባርነተይ
ከይናፍቕ ምእንቲ
እንከሎኒ ርስቲ

ኣምጽኡለይ ሽላን
ክተክል'የ ሽላን
ፍረኣን ቆጽላን
ኣቋስየ ክበልዓ
ምስ ለውዝን መሸላን

ሕዝበይ ብነጸላን
ብኸበሮን ጓይላን
"ዑፈይ ብረሪ" ቢላን
ተቖጻጽያን ደቢላን
ብዕንባባ ሽላን
ሓቚፋን ተቐቢላን. . .
ብዘይ ባይቶን ዋዕላን
ነባጒንባሕን ሽላን!

ሰዓት፡ ቀስታ ኮለል
እግራ ሰለል ሰለል. . .
ንየው ንብዓት ይውህለል
ነጀው ግን ይዕለል
ሽማግለ ጎብለል
ንድንቊር ንጽለል
ኣብራኽና ይሕለል
ንለውጢ ንምህለል

"ጎተት!" ንምውራድ
ክስኽትት በራድ
ናናሳዕ ጒያ
ክሳዕ መኣስ'ያ

ዑደት እዛ ናብራ
ከደት ከም ዛግራ
ምኽኒት ከወግድ
ስኒት ከአንግድ

ቀራና ቀራና
ናብ ጽቡቕ ምርሓና!

ስጒምታት ጉዕዞና
ብርክታት ቀራና
ወይ ንነጥር
ወይ ንጥርጥር

ውርውራ ሰንኰፍ ወቕቲ
ምንጪ ዓመጽ መግሓጥ ሃብቲ
መጻይ ደም ሕማቕ ትዕድልቲ
'ታ ድላየይ ንኸይገብር
ኅልናይ'ውን ንኸይቀብር
ምጡን ዓቐን ብምስጓም
ዚሕዘኒ ጽኑዕ ልጓም
ሞራለይ'ዩ መጥመር ማእሰር
መልክዕ ፍጥረት ናይ ሰብ ኣሰር።

ምምንዛዕ
ናይ ኣራዊት
እያ መዕነዊት

ዶብ ምስፍሕፋሕ
ከም ሮማዲ
ናይ ሰብ ዘውዲ

ከንቱ ምውፋር
ብዘይ ጓሳ
ሥርዓት ዴሳ

ዘዝወረደ ኣደራዕ
በብዓዱ እንኪሥራዕ
ኣጻብዕና ቋዕ ቆራዕራዕ
ኣብራኽና ብራዕዲ ራዕራዕ
ኣታ ንመን'ዩ ዚጥራዕ፧
ኣዴታት'የን ሽግ ተስፋ
ናይ ምድሪ ክሳዕ ኣጽናፋ

ነቲ ዘይረግጽ ሓሰኻ
"ሴፍካ'ልዕል ተራኻ!"
ዚብል ኣዋጅ በረኻ
ዘይፈትሕ ማሕለኻ

ናብ ጎልጎል መጋጠሚ
መሳበሪ ዓጽሚ
ንያቱ ጸልማት ጋህሚ
ጒዕዞ "ይኃይሽ ዓሚ!"

ኣሰሮም ኣብ ማያት
'ዞም ደቀይ ዉፉያት
ኣብ ርሑቕ ቀላያት
ምስ ዓረቦም ንያት
ጻውዒት ዘራያት
ናይ ርድኡና ኣውያት
ናይ ጠፋእና ብኽያት
በጺሑ ሰማያት. . .

ዕዮኡ ዚውጥን
ልሳኑ ዚምጥን
ምስ ዘመን ዚሥልጥን
ብመቚሕ ሰያጥን
ከይምልብስ ከይቀጥን
ኲራኡ ዚጥንጥን
ንምሕረት ዚፈጥን
ዶ'ኾን ኣይትፈልጥን፧

ካብ ናይ ስሕተት ዶባት
መዋጽኦ ብምምካር
ቆራጽ ምስንባት
ብምሕምባስ ወይ ምሕኳር
ምሕዛል ወይ ምጒርባት
ምጒታት ወይ ምሽክርካር